Zimbabwe: Mugabe yemeye amakosa yabayeho mu kwambura abazungu ibikingi

Perezida Robert Mugabe wa Zimbabwe yashyize yemera bwa mbere ko hari amakosa yabaye mu kwambura abazungu ubutaka (ibikingi) mu mwaka wa 2000, icyo gihe abahinzi b’abazungu birukanywe shishitabona mu bikingi bahingagamo bakoresheje imashini, iryo tegeko ritavuzweho rumwe ryatumye ubukungu bwa Zimbabwe bugwa hasi.

Mu kiganiro cyatambukijwe kuri Televiziyo y’igihugu, umukambwe Mugabe w’imyaka 91, yagize ati “Ndatekereza ko amasambu twahaye abaturage yari manini cyane. Kubera iyo mpamvu, abenshi muri bo ntibabasha guhinga ubutaka bwose, bahinga 1/3.”

Mugabe avuze ibi mu gihe igihugu cye cyabarirwaga mu bihugu bicuruza ibiribwa hanze, hashize imyaka 10 kigiye mu bihugu bigura ibiribwa hanze.

Zimbabwe igura ingano muri Zambia, ndetse iki gihugu gihabwa imfashanyo mu biribwa, abaturage bo mu byaro bataka inzara.

Mu 2000 nibwo abazungu b’abahinzi 4000 bakuwe mu masambu ahabwa abaturage bashyigikiye ubutegetsi bwa Zimbabwe (Ancients Combattants), ibintu byababaje ibihugu by’Uburayi.

Aba bantu bahawe ubutaka ntibabashije kububyaza umusaruro ahanini kubera ko nta bumenyi bari bafite mu buhinzi, ndetse nta n’ubushobozi mu mufuka bari bafite ngo bashoremo imari.

Gusa ariko Perezida Mugabe ntiyari yarigeze yemera ko kwambura abazungu ubutaka byatumye habaho kugabanuka k’umusaruro, kuko we yavugaga ko byatewe n’imihindagurikire y’ikirere, n’ibihano by’ibihugu by’Uburayi byatumye Leta ibura ubushobozi bwo gufasha abahinzi.

Perezida Mugabe, yavuze ko abaturage b’abirabura bazakodesha ubutaka bahawe ku bazungu bazabwamburwa, mu gihe ahanini aribwo buryo bwagiye bukoreshwa abazungu bakimara kwamburwa amasambu.

Amashyirahamwe y’abahinzi b’abazungu yamagana ubushotoranyi abahinzi bakorerwa buri gihe n’abantu biyita ko bakorera ishyaka rya Zanu-PF, rya Perezida Mugabe, rifite ubutegetsi kuva mu mwaka wa 1980 igihugu cyabona ubwigenge.

JeuneAfrique

UM– USEKE.RW