Russia: Putin yashyizeho itegeko ryo ‘GUTWIKA’ ibicuruzwa bitemewe biva i Burayi

Ibicuruzwa biva i Burayi cyangwa muri America byashyizwe ku rutonde rw’ibitemewe kwinjira (embargo) mu gihugu cy’U Burusiya kubera intambara yo muri Ukraine, hagiyeho itegeko ryo kubitwika aho kubisubiza mu bihugu byavuyemo.

Iri tegeko ryatangajwe ku wa gatatu tariki 29 Nyakanga, n’Ibiro by’Umukuru w’igihugu Kremlin.

Kuva mu gihe cy’umwaka ushize, U Burusiya bwashyizeho ibihano kuri bimwe mu bicuzwa by’ibiribwa biva mu bihugu byafatiye U Burusiya ibihano kubera uruhare byabukekagaho mu ntambara yayogoje Ukraine mu minsi yashize, ibi bihano byagize ingaruka zikomeye ku bahinzi bo ku mugabane w’Uburayi.

Iri tegeko rishya ryashyizweho rizatangira gushyirwa mu bikorwa tariki ya 6 Kanama 2015 aho ibicuruzwa byose bigamijwe gucuruzwa ku isoko bizajya bifatwa kandi biri mu byabujijwe bizajya bitwikwa, keretse ibyo bazajya basanga ari umuntu ku giti cye wabyinjije agamije kubikoresha iwe, cyangwa byari bigamije koherezwa mu kindi gihugu nk’uko bikubiye muri iryo tegeko.

Nubwo mu gihugu cy’U Burusiya hashyizweho ibihano ku bicuruzwa byiganjemo ibyo kurya, ku mupaka w’icyo gihugu hafatirwa amakamyo menshi atwaye inyama, ibikorwa mu mavuta y’inka (fromage), imbuto n’imboga.

Ubu ibyo byose byafatwaga byahitaga byoherezwa mu gihugu byaturutsemo. Itegeko rishya ry’U Burusiya riravuga ko ibicuruzwa bizangizwa atari ibizafatirwa ku mupaka gusa.

Muri iri tegeko ntabwo hashyizwemo uburyo ibizafatwa bizangizwamo. Ikinyamakuru Kommersant, kivuga ko n’ubusanzwe ku mipaka y’U Burusiya habaga ibyuma byagenewe gutwika ibicuruzwa byateza ingaruka mbi byabaga byafashwe, gusa ngo kugira ngo ibyo byuma bitunganyirizwe gutwika ibicuruzwa byinshi bishobora gutwara amafaranga menshi.

Libre Belgique

UM– USEKE.RW