//Hari uburyo bwo gusomana bushobora kukwanduza SIDA

Hari uburyo bwo gusomana bushobora kukwanduza SIDA

Aho iterambere ritangiye kuzamuka mu gihugu cyacu ntiribura kuzana n’indi mico usanga tutamenyereye, muri iki gihe urubyiruko rurangwa n’utuntu twinshi dushya baba babonye ku mateleviziyo,mu binyamakuru, interineti n’ibindi, muribyo gusomana usanga benshi mu babyiruka bavuga ko bakora kenshi.

'French Kiss' hari ibyago bicye byo kuyanduriramo mu gihe hari ibikomere mu kanwa
‘French Kiss’ hari ibyago bicye byo kuyanduriramo mu gihe hari ibikomere mu kanwa

Nubwo babisobanurirwa kenshi bamwe muri uru rubyiruko usanga bagumana impungenge bibaza niba usomanye n’uwanduye agakoko gatera SIDA nawe utakahavana.

Agakoko gatera SIDA gakwirakwizwa mu inzira 3; imibonano mpuzabitsina idakingiye, umubyeyi uyanduza umwana we igihe amubyara cyangwa amwonsa ndetse n’ibikoresho bikomeretsanya igihe byakomerekeje uwanduye agakoko gatera Sida.

Nkuko tubikesha ikigo Center of Disease Control cy’Abanyamerika, kugirango wandure agakoko gatera SIDA mu gusomana byaterwa nuburyo wasomanye.

Ngo ntabyago byo kwandura igihe wasomanye n’uwanduye agakoko gatera Sida igihe musomanye iminwa yanyu ifunze (closed-mouth kissing.)

Gusa ngo hari ibyago, nabyo bicye, byo kwandura igihe wasomanye iminwa ifunguye (french kissing) mu gihe uwo musomana ava amaraso mu ishinya, mugahererekanya urwo ruvangitirane rw’amatembabuzi yo mukanwa n’ayo maraso ava mu ishinya.

Iki kigo kikaba kigira Inama yo kureka gusomana muri ubwo buryo n’uwanduye ako gakoko, kuko hari ibyago (nubwo ari bicye) byo kuba habaho kwivanga kw’amaraso mu gihe hari ibikomere biri ku mashinya y’abasomana.

Ku itariki ya 11/07/1997 iki kigo cyashyize ahagaragara umuntu kivuga ko yanduriye muri ubu buryo.

Ni umugabo wari waranduye agakoko gatera SIDA nyuma y’igihe asomana byimbitse n’umugore we wari utarandura, aza kumwanduza mu gihe bari barafashe umwanzuro wo kutaryamana uretse gusomana gusa.

Inkomoko yo kwanduza umugore we, yari amatembabuzi n’amaraso yo mu kanwa yanduye yavaga muri icyo gikorwa kuko uyu mugabo yari arwaye ishinya, kuva amaraso byari byoroshye ku buryo no mu gihe yasukuraga mu kanwa yavaga.

Corneille Killy Ntihabose
UM– USEKE.COM