//Ban Ki-moon yahamagaye Kabila na Kagame abasaba kugira icyo bakora ngo intambara ihagarare

Ban Ki-moon yahamagaye Kabila na Kagame abasaba kugira icyo bakora ngo intambara ihagarare

Umunyamabanga mukuru w’Umuryango w’Abibumbye Ban Ki-moon kuwa gatatu tariki 11 Nyakanga yahamagaye ba President Joseph Kabila wa DRCongo na Paul Kagame w’u Rwanda abasaba kugira icyo bakora kugira ngo amahoro agaruke muri Kivu y’amajyaruguru.

Ban Ki moon yavuganye naba President Kagame na Kabila/United Nations Photo
Ban Ki moon yavuganye na ba President Kagame na Kabila/United Nations Photo

Martin Nesirky, umuvugizi wa UN, yatangaje ko kuwa gatatu, shebuja Ki-moon yahamageye aba bagabo bombi abaganiriza ku kibazo cy’intambara iri muri kariya karere ituruka ku kuba umutwe wa M23 isaba Leta ya Kinshasa kubahiriza amasezerano yasinywe kuwa 23 Werurwe 2009.

Ban Ki-moon akaba kandi ngo yavuganye na President Kagame w’u Rwanda, rwagize uruhare muri ariya masezerano, ku bijyanye no kuba u Rwanda ruregwa kuba rushyigikira uriya mutwe wa M23 nk’uko tubikesha AFP.

Martin Nesirky yavuze ko Ban Ki-moon yasabye bano bagabo bombi kugira icyo bakora mu guhagarika intambara iri muri Nord Kivu. Nubwo UN ihafite ingabo zishinzwe kubungabunga amahoro.

Ki-moon yasabye aba bagabo gushaka “inzira zose zishoboka zo gukemura ikibazo cy’intambara ihari”. Cyane cyane ngo “kubuza umutwe wa M23 gukomeza gufata utundi duce no guhagarika imirwano” – Martin Nesirky.

 

u Rwanda, ruvuga ko rwagaragaje ubushake mu gukemura ikibazo cy’intambara ihari; mu kwezi gushize ubwo abayobozi bakuru b’ingabo z’u Rwanda bagiye i Goma kubonana n’abayobozi bakuru b’ingabo za DRCongo kuri kiriya kibazo.

Mu kwezi gushize kandi, Ministre Louise Mushikiwabo w’Ububanyi n’amahanga yerekeje i Kinshasa kuvugana na mugenzi we ku ngamba zafatirwa ikibazo gihari.

Congo yo yakomeje gushinja u Rwanda kuba inyuma y’umutwe wa M23, ugizwe n’abanyeCongo bavuga Ikinyarwanda.

Leta y’u Rwanda muri Werurwe 2009 yagize uruhare mu gushakira amahoro Uburasirazuba bwa Congo mu masezerano n’ibiganiro hagati y’umutwe wa CNDP (icyo gihe) na Leta ya Kinshasa, hari kandi n’intumwa z’umuryango w’abibumbye.

Imyaka itatu nyuma, havutse umutwe w’ingabo wiyita M23, wavuye mu ngabo za Leta (FARDC) ugizwe ahanini n’abari bagize CNDP, ushinja Kinshasa kutubahiriza amasezerano ya Werurwe 2009.

Leta y’u Rwanda nayo ishinja ubuyobozi bwa DRCongo kuba bwarananiwe kurangiza ikibazo cy’umutwe wa FDLR, ugizwe n’abanyarwanda bakekwaho gusiga bahekuye u Rwanda mu 1994.

Ubwanditsi
UM– USEKE.COM